Table of Contents
یاالہی ہرجگہ تیری عطاکا ساتھ ہو
امام اہلسنت مجدد دین وملت
مولانا شاہ احمد رضاخان رحمۃ اللہ علیہ
یاالہی ہرجگہ تیری عطاکا ساتھ ہو
جب پڑے مشکل شہِ مشکل کُشاکا ساتھ ہو
یاالہی بھول جاؤں نزْع کی تکلیف کو
شادئ دیدارحسنِ مصطفے کا ساتھ ہو
یا الہی گورتیرہ کی جب آئے سخت رات
انکے پیارے منہ کی صبح جانفزاکا ساتھ ہو
یاالہی جب پڑے محشر میں شورِ داروگیر
امن دینے والے پیارے پیشواکا ساتھ ہو
یاالہی جب زبانیں باہر آئیں پیاس سے
صاحب کوثرشہِ جودو عطاکا ساتھ ہو
یاالہی سردمہری پر ہو جب خورشید حشر
سید بے سایہ کے ظلِّ لواکا ساتھ ہو
یاالہی گرمی محشر سے جب بھڑکیں بدن
دامنِ محبوب کی ٹھنڈی ہوا کاساتھ ہو
یاالہی نامۂ اعمال جب کھلنے لگیں
عیب پوش خلق ستار خطاکا ساتھ ہو
یاالہی جب بہیں آنکھیں حساب جرم میں
ان تبسم ریز ہونٹوں کی دعا کا ساتھ ہو
یاالہی جب حساب خندۂ بیجا رلائے
چشم گریان شفیع مرتجٰے کا ساتھ ہو
یاالہی رنگ لائیں جب مری بے باکیاں
انکی نیچی نیچی نظروں کی حیاکا ساتھ ہو
یاالہی جب چلوں تاریک راہ پل صراط
آفتاب ہاشمی نورالہدیٰ کا ساتھ ہو
یاالہی جب سرشمشیر پر چلنا پڑے
رب سلّم کہنے والے غمزدہ کا ساتھ ہو
یاالہی جودعائے نیک میں تجھ سے کروں
قدسیوں کے لب کے ٰامین ربّنا کا ساتھ ہو
یاالہی جب رضا خواب گراں سے سراٹھائے
دولت بیدارعشق مصطفے کا ساتھ ہو